64TE86C Maritime høgspenningsinstallasjonar - 2027 Vår

Emnet skal gi kandidaten kunnskapar og systemforståing om oppbygging, verkemåte og drift av høgspenningsanlegg offshore, i maritime system og på land. Vidare skal kandidaten ha kjennskap til isolasjonstekniske og materialtekniske problemstillingar i høgspenningsanlegg. Emnet gir kandidaten ei innføring i gjeldande regelverk og prosedyrar for sikkert arbeid i høgspenningsanlegg.

Tema i emnet er:

• Oppbygging, drift og verkemåte for høgspenningsanlegg på land, offshore og i maritime system
• Komponentar i høgspenningsanlegg. Ulike typar vern og tryggleik.
• Elektrostatikk. Isolasjonskoordinering. Overspenningar.
• Materialkunnskap om utstyr og kabel. Faste, flytande og gassforma isolasjonsstoff. Utrekningar (ståande spenningar i skjermen på einleiarkablar og sirkulerande straumar).
• Regelverk for land, maritime system og offshore.
• Laboratorieøvingar: Partial Discharge, resonanstest og VLF-test.

Kandidaten

• har kunnskap om energiproduksjon og -distribusjon i høgspenningssystem.
• har innsikt i oppbygging, funksjon, testmetodar, drift, vedlikehald og tryggleikskrav for høgspenningskomponentar og -anlegg.
• kjenner til gjeldande forskrifter og normar innanfor fagområdet.
• har forståing for konstruksjon og belastningar som påverkar høgspenningskomponentar.

Kandidaten

• kan bruke målemetodar, feilsøkingsmetodikk og relevante instrument.
• forstår og kan bruke berekningsmetodar innanfor faget.
• kan planlegge og arbeide trygt i maritime høgspenningsanlegg.
• har kunnskap om skøyting og endeavslutning av høgspenningskablar i tråd med gjeldande prosedyrar.

Kandidaten

• kan formidle informasjon om høgspenningsanlegg knytt til teoriar, problemstillingar og løysingar.
• har eit medvite forhold til eigne kunnskapar og ferdigheiter og respekt for andre fagområde og fagpersonar.
• kan bygge relasjonar med fagfellar og på tvers av fag for å oppnå tryggleik ved arbeid i høgspenningsanlegg.
• kan dele kunnskapane og erfaringane sine med andre.

Undervisninga er i stor grad basert på lærebøker, førelesingar, arbeid med oppgåver og laboratorieøvingar. I nettbaserte og samlingsbaserte studium vil det vere lærarstyrte aktivitetar mellom samlingane, synkrone og/eller asynkrone, for å støtte kommunikasjonen og sikre god progresjon i faget. Det er venta at studenten har eit aktivt forhold til rettleiing.

Mappevurdering av arbeidsmappe med læringsnotat og case. Tilbakemeldingar og rettleiing frå lærar.

Karakterskala A–F, der F svarer til ikkje bestått.

Arbeidskrava må vere godkjende før kandidaten kan gå opp til vurdering.

Læreboka blir oppgitt ved studiestart.
Kompendium/notat blir delte ut i timane.

Aktuelt regelverk:

• NEK 410
• NEK 440
• DNV
• FSE
• IEC 61892

Teststandardar:

• IEC 60502-2
• IEC 60840